Μετά φόβου και χαράς τη Πανάγνω εκβοήσωμεν:

Χαίρε του Σωτήρος η ευδοκία, δι’ ης τα πέρατα εγνώσθη θεογνωσία· Χαίρε του Υιού η κατοίκησις, εν η ο σαρκοφόρος προελήλυθε. Χαίρε των Σεραφίμ ενδοξοτέρα. Χαίρε του ουρανού πλατυτέρα. Χαίρε ηλίου λαμπροτέρα. Χαίρε Σελήνης φωτεινοτέρα. Χαίρε των αστέρων πολυαρίθμητος έλλαμψις. Χαίρε νεφέλη κούφη, η τον όμβρον τον ουράνιον επιρράνασα. Χαίρε αστραπή, η τας όψεις των πιστών ηρέμα καταυγάζουσα. Χαίρε βροντή πνευματική, η αψοφητί ενηχούσα τοις ωσί των ανθρώπων. Χαίρε έμπνευσις αγία, τα πνεύματα της κακίας εκ γης αξαφανίσασα. Χαίρε Προφητών το περίδοξον κήρυγμα. Χαίρε Αποστόλων το παγκόσμιον περιήχημα. Χαίρε των Μαρτύρων η υπέρτιμος ομολογία. Χαίρε Πατριαρχών η πολυϋμνητος δοξολογία. Χαίρε των Οσίων ο υπέρτατος κόσμος. Χαίρε των δικαίων η αληθεστάτη τρυφή. Χαίρε των παρθένων το πανόλβιον καύχημα. Χαίρε βασιλέων σκήπτρον και κραταίωσις. Χαίρε Αρχιερέων λειτούργημα μέγιστον. Χαίρε αμαρτωλών καταφύγιον άρρηκτον. Χαίρε πλεόντων κυβέρνησις ένδοξος. Χαίρε πιπτόντων ανόρθωσις, Δέσποινα. Χαίρε νοσούντων ιατήριον άμισθον. Χαίρε θνησκόντων βεβαία ανάστασις. Χαίρε αφορμή της πάντων σωτηρίας. Χαίρε του κόσμου χαρά ανεκλάλητος. Χαίρε ειρήνης η πρόξενος, Άνασσα. Χαίρε μητέρων αγλάϊσμα, Άχραντε. Χαίρε του Λόγου χωρίον ευρύχωρον. Χαίρε πρεσβυτών κραταιά βακτηρία. Χαίρε των νέων θεία παιδαγωγία. Χαίρε νηπίων λαμπρόν περιφύλαγμα. Χαίρε των υπ’ ουρανόν πάντων η μεσίτις. Χαίρε της οικουμένης η ανάκλησις. Χαίρε ουρανού και γης πανήγυρις ένδοξος. Χαίρε Κεχαριτωμένη ο Κύριος μετά Σου· ο προ Σου και εκ Σου και μεθ’ ημών, ο Υμνούμενος συν τω Πατρί και τω Παναγίω και Αγαθώ και Ζωοποιώ Πνεύματι, νυν και αεί και εις τους αιώνας των αιώνων. 

(του Αγίου Ταρασίου)